ทุติโย ภาโค [1] ธนสฺส ทุพฺพิธํ กิจฺจํ, ปาเปติ อุณฺณตํ ธนิํ; อธนิํ โอณตํ โลเก, สญฺจิเน เตน ตํ ธนํฯ [2] วฏฺฏเต สตตํ สีฆํ, กาลจกฺกํ อวาริตํ; เตน ฆฏี ทินํ มาโส, วสฺโส ภวตฺย จีรโตฯ [3] สตฺตุนา น หิ สนฺเธยฺย, เอกทา โส ภยํ กโร; สุตตฺตมปิ ปานียํ, สมยเต นุ ปาวกํฯ [4] วิชหํ ปกติํ โย หิ, วิกติํ ปุน คจฺฉติ; สภาเวน อากาเรน, วิปฺปลฺลาสํ ส คจฺฉติ; สํสุมาร คตา โคธา, ยถา ถี ปุมเวสิกาฯ [5] ปกฺขํ ลทฺธาน อุฑฺเฑนฺติ, อุปจิกา หิ วมฺมิกา; นิกฺขนฺตา มรณํ ยนฺติ, อุปฺปตา นิปฺปตํ คตาฯ [6] สพฺพํปิยสฺส ทชฺเชยฺย, นิสฺเสสํ ปิยมานสํ; สทฺธาจิตฺตํ ตุ โน วิญฺญู, สทฺธายิโก ปกฺขลิโตฯ [7] สกฺโกติ ลงฺฆิตุํ พฺยามํ, มหุสฺสาเหน โย หิ โส; ตทฑฺฒํ อนุสฺสาเหน, โนสฺสาโห เตสุ โถมิโต; มหุสฺสาโห ทุกฺโข โลเก, อนุสฺสาโห สทา สุโขฯ [8] ทุกฺขมํ อกฺขมนฺโต โย, ปิฏฺฐิการีจ ทุกฺกรํ, กทา ลเภยฺย โส โลเก, สุขมํ สุกรํ มุธา; ปจฺจกฺขญฺหิ โส กเรยฺย, ทุกฺขมญฺจาปิ ทุกฺกรํฯ [9] อนคฺโฆ มนุสฺโส โลเก, โตสนาโปสนาทินา; เตน โส มหคฺฆํ กมฺมํ, กเร โลกหิตายุตํฯ [10] วาเตน นปฺปภิชฺชนฺติ, นินฺนา เวฬู กสา นฬา; ยถาวาตํ นคจฺฉนฺติ, ตถา จเร ชเน กทาฯ [11] ปุรโต จ ปจฺฉโต เจ, นิสฺสโย นตฺถิ ปสฺสโต; อธิกํ วีริยํ โหติ, อตฺตนาโถ ตทา ภเวฯ [12] ขณํ อาขุพิลํ สีโห, ปาสาณสกลากุลํ; ปปฺโปติ นขภงฺคํวา, ผลํวา มูสิโก ภเวฯ [13] มคฺคมุฬฺหา ชนา อนฺธา, อมคฺคา มคฺคสญฺญิโน; ตเถว ทุปฺปญฺญา มุฬฺหา, ตถตฺถํ นาว พุชฺฌเรฯ [14] ปิยรูปํ วีรรูปํ, ทุวิธา รูปสมฺปทา, นาริํ อิจฺเฉ ปิยรูปิํ, ปุริสํ วีรรูปกํฯ [15] ปชฺชลนฺติ หิ ขชฺโชตา, ปกฺขจาลนกมฺมุนา; กุสิตา สุปิตา เนเต, ตถา ชนาปิ กมฺมิกาฯ [16] กุมฺมสงฺโกจโมปมฺย , นิคฺคหมปิ สํขเม; ปตฺตกาเล ตุ นีติญฺโญ, กณฺหสปฺโปว อุฏฺฐเหฯ [17] ภกฺขเสสํ นขาทนฺติ, สีหา อุนฺนตเจตสา; ปรํปิ นปณาเมนฺติ, วุทฺธิกามา ตถา จเรฯ [18] น ว วสฺโส สมุปฺปนฺโน, ขีโณ ปุราณหายโน; นววสฺเส นวา เมตฺตา, ภาวิตพฺพา หิเตสินาฯ [19] สนฺตาปยนฺติ กมยาปฺยภุชํ น โรคา, ทุมฺมนฺตินํ กมุปยนฺติ น นีติโทสา; กํ สฺรี น มานยติ กํ น จ หนฺติ มจฺจุ, กํ ถีกตา น วิสยา ปริปีฬยนฺติฯ (วสนฺตติลกาคาถาฯ) [20] (ก) พฺยามมตฺเตน ทณฺเฑน, โยลุมฺพฺย อุทกํ มิเน; อคมฺภีรํ คมฺภีรํวา, อคาเธ มญฺญิ คมฺภีรํฯ (ข) ตถา มนฺโท สญฺญาเณน, อคาเธ มญฺญิ ปณฺฑิตํ; สมาสมํ น ชานาติ, พหฺวปฺปํ ติกฺขมนฺทตํฯ [21] ทุฏฺฐกมฺเม สงฺคมนฺติ, เฉกกมฺเม จ โน อิธ; มจฺจุํ วหนฺติ สีเสน, เต มุฬฺหา มุฬฺหสงฺคมาฯ [22] ทุวิโธ สงฺคโม โลเก, อุชุโก กุฏิโล ภเว; อุชุโกว ปสํเสยฺโย, โนหฺยญฺโญ สาชสงฺคโมฯ เต อิมินา อุปาเยน สมคฺคา สมฺโมทมานา มหา ภิตฺติปิฏฺฐิกาย วสนฺติฯ (มโหสธชาตก อฏฺฐกถา) [23] ยูถิกา ปุปฺผเต โนหิ, สิญฺจิตาปิ ปุนปฺปุนํ; ปุปฺผเต สมฺปตฺเต กาเล, เอวํ ธาเรถ วีริยํฯ [24] ธนุจฺจโย ธนกฺเขโป, ทุวิธา หิ ธนากติ; ธนุจฺจเย นโย อตฺถิ, ธนกฺเขปมฺหิ โน อิธฯ [25] อมาตา ปิตรสํ วฑฺฒํ, ชูตการญฺจ จญฺจลํ; นาลเปยฺย วิเสสญฺญู, ยทิจฺเฉ สิทฺธิ มตฺตโนฯ หลิทฺทิราคํ กปิจิตฺตํ, ปุริสํ ราควิราคินํ; เอทิสํ ตาต มาเสวิ, นิมฺมนุสฺสํปิ เจ สิยาฯ [26] คุณา คุณญฺญูสุ คุณา ภวนฺติ, เต นิคฺคุณํ ปตฺวา ภวนฺติ โทสา; อาสาทฺยโตยา ปภวนฺติ นชฺโช, สมุทฺรมาสชฺช ภวนฺตฺยเปยฺยาฯ (อุปชาติคาถา) [27] สิลารูปํ นิมฺมินนฺติ, โกฏฺเฏตฺวาน ปุนปฺปุนํ; โกฏฺฏโกว ตถา พาลา, สาธุํ โอวชฺช นิมฺมิตาฯ จาณกฺยนีติลา คาถา ลาลเน พหโว โทสา, ตาฬเน พหโว คุณา; ตสฺมา ปุตฺตญฺจ สิสฺสญฺจ, ตาฬเย น จ ลาลเยฯ [28] |